«Ача-аван пиалже — икшыве», — маныт калыкыште. Тугеже йочан пиалже — воктен улшо кугыеҥ-влак пелен. Тӱрлӧ амаллан кора южо йоча тулыкеш кодеш, ача-аван йӧратымыже, перегымыже, шыматымыже деч посна кушкеш. Тыгай икшыве-шамычым шке ешышкышт ашнаш налше еҥ-влак пеш поро чонан да кӧргӧ виян улыт. Нуно йоча-шамычлан шӱм-чон шокшыштым, пагалымашым, умылымашым, аралтышым пӧлеклат.
27-28 июньышто тыгай еш-шамыч Таир ер воктене верланыше «Журавушка» социал-реабилитаций рӱдерыш погыненыт. Тушто икшывым ашнаш налше ача-ава-шамычын да опекун еш-влакын «Встреча друзей» форумышт эртаралтын. Чылаже 29 еш лийын. Кок кече жапыште нуно психолог дене вашлийыныт, тӱрлӧ модмашыш, мастер-классыш ушненыт. Вашлийын мутланеныт, шке опытышт дене палдареныт.
Теве Волжский район Купсола села гыч Элембаевмыт ешат (снимкыште) ты форумышко ушнен. Лилия ден Григорий ныл икшывым: Каролинам, Заринам, Георгийым, Василисам — куштат. Кажныжым шке йочашт семынак йӧратат. Йоча йӱк дене йоҥгалтше еш икоян да пиалан. Тушто йӧратымаш да умылымаш озаланат.
Оля МАЙКОВА.
Авторын фоТОЖО.
