Кодшо арнясе номерыште «Рвезе йӱк» конкурсым иктешлыме нерген возенна ыле. В.Исенеков лӱмеш премий дене Морко район Арын школын «Сескем» кружокшо палемдалтын. Вуйлатышыже – тӱҥалтыш класслам туныктышо О.А.Васильева . Олимпиада Алексеевна Морко район Изи Корамас школышто тунеммыж годым шкежат «Ямде лий» газет дене пеҥгыде кылым кучен.
– Ачана Алексей Нестерович ятыр газет ден журналым наледен. Марлат, рушлат моткоч шуко лудынна. Ме, йоча-влак, «Ямде лийым» йӧратенна. Шуматкечын, школ гыч куржын толын, почтальоным вучаш тӱҥалынна. Чатлама йӱштӧ годым окна яндасе ийым шулыктарен, изирак рожым ыштен, пий опталтыме йӱкым колыштын, чон вургыж онченна. Ме эре ачана деч примерым налынна. Кочкаш шинчеш, каналташ возеш – эре газетым лудеш, – шарналта Олимпиада Алексеевна.
Изи Олимпиада йомакым, мыскара сынан ойлымашым лудаш, «Вот вет, кузе вет» рубрикым шергалаш йӧратен. Кажне газет номерыште кроссвордысо йодыш-шамычлан вашмутым ака-шӱжар-влак дене ӱчашен-ӱчашен кычалыныт. Эсогыл школысо книгагудыштат ятыр шинчылтыныт.
Кугурак лиймеке, чолга ӱдыр конкурслашке ушнаш тӱҥалын. О.Васильева тушто кок гана усталыкшым терген. Пӧлек шотеш колтымо фотографийлам кызытат сайын шарна. Икана фотошто омарташте шинчыше шырчык лийын, вес гана – йӱдвелысе пӱчӧ. Нунылан ачаж дене пырля рамым шке ыштеныт да моторын сӧрастареныт.
– Возымо пашам колтымеке, «Ямде лий» газет редакций гыч Валентин Исенеков деч серыш толын. Шарнем, письма кагазше сур-йошкарге тӱсан, текстшым машина дене печатлыме лийын. Валентин Бори-сович йоча-влакын серыме кумылыштым йӧршын волтен огыл, кӱлеш шомакым муын моштен. Серыш толмеке, иктаж-кушко шылын шинчын лудынам. Кызыт письма ден возымо пашам-влакым лудаш могай оҥай ыле. Чаманен каласаш логалеш, суртнам «йошкар агытан» авалтен, – ойла Олимпиада Алексеевна.
Тӱҥалтыш класслам туныктышо кызыт Арын школышто «Сескем» кружокым вуйлата. Ӱдыр-рвезе-влакым сылнымутлан шӱмаҥда, чын возаш туныкта. Лектышыштат сай.
