Пагалыме лудшына-влак, стритбол нерген колында? 2-шо номеран Кужэҥер школышто 7-ше классыште тунемше Ариана Романова (снимкыште) раш умылтарен кертеш. Стритбол баскетболым ушештара. «Street» урем манын кусаралтеш, «ball» – мече. Ожно стритбол дене оласе площадьлаште модыныт.
Ариана баскетбол дене визымше ий кылым куча, стритбол дене – кумшо ий. Спортын ты видше-влакын пайдаштым умыла да тидлан ятыр жапым ойыра.
– Баскетбол дене модмо годым капкыл, чытыш пеҥгыдемыт, чулымрак лият, писынрак шонаш тӱҥалат, икте-весе коклаште кылым муаш тунемат. Стритбол мемнан кундемыште утыжым вияҥын огыл. Баскетбол дене таҥастарымаште командыште 3-4 еҥ веле модеш. Модмо пасу пелыже гына лиеш. Корзиҥгажат икте веле, – ойла чолга ӱдыр.
Ариана «Энергия» командыште шуаралтеш. Тренерышт – В.Л.Терёшин. Ӱдыр-влак дене Чебоксар, Озаҥ олалашке таҥасымашлашке миеныт, призёр лийыныт. Ӱдыр тыгак шахмат дене, футболла модеш, ече дене писын коштеш, талын куржталеш. ГТО нормативым кок ий почела шӧртньӧ знаклан сдатлен. «Спортсмен года – 2023» школ конкурсышто сеҥышыш лектын.
– Ончыкыжым баскетбол командым чумыраш шонем. Ӱдыр-рвезе-влакым спортлан кумылаҥдаш тӱҥалам, – ойла Ариана.
