11 ноябрьыште С.Г.Чавайн лӱмеш Национальный книгагудын ик пӧлемыштыже илыш мӱкшотарысе семын шолын. Тушто «Мунло» республикысе уш-акыл марафон эртаралтын. Тудым Республикысе марий тӱвыра рӱдер эртарен. Уш-акыл марафон шочмо кундемлан да Калыкын икоян улмо кечылан пӧлеклалтын. Таҥасымашке Морко, Оршанке, Звенигово, Параньга, Кужэҥер, Советский, Килемар районла, Йошкар-Ола гыч латик команде ушнен.
Иктешлымеке, Кужэҥер район Коҥганур школ гыч «Чумбылат» команде сеҥышыш лектын. Тиде Никита Пауткин, Кирилл Иванов, Алексей Тобеков, Анна Варахина, Анна Соколова, Анна Петухова. Нуным снимкыште туныктышышт Г.С.Тобекова дене пырля ужыда.
– Ме кажне йодышым тӱткын колыштынна. Икте-весе дене каҥашен, чын вашмутым пуэнна. Марий йылмым да литературым туныктышо Галина Степановна мемнам сайын ямдылен. Ятыр книгам, журналым, газетым шергалынна, кодшо ийлаште эртаралтше уш-акыл марафонын йодышыжо-влакым лончыленна. Кумшо тур куштылгынрак чучын. Ешыште, школышто марий пайрем-влакым пайремлена, садлан начар огыл палена, – ойлышт йоча-влак.
Ӱдыр-рвезе-влак шинчымашыштым кум турышто тергеныт. Икымшыште лӱмлӧ еҥ-шамычым шарналтеныт, кокымшышто – марий сылнымутым, кумшышто – историйым да йӱлам.
– Сеҥымаш тӱҥ огыл, тӱҥжӧ – пырля лиймаш. Иквереш погынен веле, ик вийыш савырнеда. Модмаш деч куаным, у шинчымашым налза, – ойлыш Республикысе марий тӱвыра рӱдерым вуйлатыше Н.В.Пушкина.
Кужэҥер район Коҥганур школын «Чумбылат» командыже эн мунло лийын. Советский район Ӱшнӱр школын «Ӱшан» командыже кокымшо верым сеҥен налын, кумшо верым – Национальный сымыктыш гимназийын «Гимназист-влак» командыже.
– «Мунло» уш-акыл марафонышко ий еда ушнена. Ме марий йылмым, сылнымутым, йӱлам урокышто келгын шымлена. Школышто тидлан пӧлеклалтше ятыр мероприятий эртаралтеш. Ешыштынат марий йӱлам жаплена, марий пайремым пайремлена. Коча-кована, ача-авана деч йодыштына. Тидлан пӧлеклалтше проект, шымлыме паша-влакым возена. Марафонышто вес ийынат уш-акылнам тергаш, шинчымашнам утларак келгемдаш шонена, – ойлышт Ӱшнӱр школышто тунемше ӱдыр-рвезе-шамыч.
