Тыге ойла 1-ше номеран Звенигово школын 9-ше классыштыже тунемше Ваня Старыгин. Тудо каратэ секцийыш шым ияшыж годым кошташ тӱҥалын. Тачысе кечылан 150 наре медальже уло. Шукерте огыл Озаҥ олаште эртаралтше тхэквондо дене «Тӱнямбал Кубок» таҥасымаште той медальым сеҥен налын. Новочебоксарск олаште каратэ дене эртаралтше «Жемчужина Поволжья» регион-влак кокласе турнирыште кокымшо лийын. Ванян каратэ дене кокымшо данже уло, тхэквондо дене – кудымшо гып. Шукерте огыл судьялан тунем лектын. Самырык спортсменлан икмыняр йодышым пуышым.
– Ваня, сеҥымашыш шуаш мо полша?
– Чытыш да тыршымаш тӱҥ верыште улыт. Адакшым изинек жапым моштен да пайдалын кучылтман. Кечеш кок гана тренировкышко коштам. Тений тхэквондо дене кылым кученам. Каныш кечылаште тӱрлӧ турнир але таҥасымашке ушнем. Мыйын тӱҥ эҥертышем-влак авам Ольга Сергеевна да тренер Сергей Владимирович Пягай улыт. Нуно пеленем лияш тыршат, ӱшанат. Эҥертыш улмо годым сеҥаш куштылгырак.
– Мыйын шонымаште, кажне йочан кумирже уло. Тыйын кӧ?
– Мый Российын каратэ федерацийжын шеф-инструкторжо Олег Алексеевич Цойым кумиремлан шотлем. Тудын эртарыме семинарышкыже кертмем семын коштам. Москошто, Тулаште, Набережный Челныште лийынам. Икана, гипс йолан каенам. Семинарыште, гипсым кудашын, пеҥгыде тасмам пӱтырен, приём-шамычым пелйола ыштенам.
– Тый Марий Элын чапшым тӱрлӧ таҥасымаште аралет. Умбакыжат у сеҥымашыш шуаш тыланем.
– Тау, Тыршаш тӱҥалам.
