Лум шулен гынат, тале ечызе-влак канаш огыт шоно. Тыгай спортсмен-шамыч коклаште – 1-ше номеран Шернур школын 11-ше классыштыже тунемше Диана САДОВИНА. Кызыт ролик ече дене коштеш, куржталеш. Тудо 2-шо классыште шинчымашым погымыж годым спорт дене кылым кучаш тӱҥалын.
– Телевизор дене биатлоным ончаш йӧратенам. Антон Шипулинын ече дене талын коштмыжым, винтовко дене туран лӱйкалымыжым ӧрын да кугешнен эскеренам. Тудын гай тале спортсмен лияш шоненам. Шонымашке шуаш ача-авам да тренер Виталий Лаврентьевич Смоленцев полшеныт, – ойла ӱдыр.
5-ше классыште тунеммыж годым ече дене таҥасымаште икымше гана сеҥен. Икымше медальым налмыжым сайын шарна. Тылеч вара шукырак да шукырак «шӧртньым» сеҥен налаш кумылжо лектын. Кызыт Дианан 100 наре медальже погынен. 2019 ийыште ече дене кугыеҥын икымше разрядшым налын.
– Кажне таҥасымаш деч ончыч тургыжланем. Стартыште шогымо годым шкаланем ойлем: «Мый кертам, шке виемлан ӱшанем». Тыге чонлан куштылгырак чучеш. Финиш дек лишемме тат эн чот келша. Тренеремын йӱкшым коламат, нойымем мондалтеш. Ончыкылык илышемым правам аралыше орган дене кылдынем, садлан спорт мыланем полша манын шонем, – ойла Диана.
