Школьник-влакын российысе толкынышт эн чолга, эн ушан, эн уста йоча-влакым иктыш ушен манам гын, йоҥылыш ом лий, очыни. Теве Советский район Алексеевский школын 11-ше классыштыже тунемше Софья МАМАЕВА шкенжым тӱрлӧ аланыште тергаш жапым муэш. Тудо «Школьная планета» йоча ушемын президентше.
– Ме РДШ-ын эртарыме чыла гаяк конкурсышто мастарлыкнам ончыкташ тыршена. Школысо ик мероприятийыштат ӧрдыжеш огына код. «Смайлики» школ газетлан статьям возена, тудым сӧрастарымаште тыршена. Ӱдыр-рвезе-влакым таза илыш-йӱлалан кумылаҥдена. Шке моштымашна дене моло-влакым палдарена, – ойла ӱдыр.
Софья чолга улмыж дене чылалан примерым ончыкта. «Это могу я! Со мной мои друзья!», «Выбирай жизнь», «Весна 45 года», «Ликует светлый май» да ятыр моло конкурсышто сеҥышыш лектын. Яра жапыште кушта, баскетбол, ӱстембал теннис, волейбол дене модеш, куржталеш, мотор фотом ышта. Чыла вере ончылно лияш тырша.
– Школьник-влакын российысе толкынышт ончылно лияш, мастарлыкын шулдыржым кумданрак шаралташ йӧным ыштен да туныктен. Ик ойым ушыштем эре кучем: «Лӱдмым, йогым, кокытеланымашым сеҥен кертше веле илышыште сеҥымашке шуэш». Нине шомак-влак шонымашке шу-аш полшат, – ойла чолга ӱдыр.
