Самырык тукымым патриотизм шӱлышеш кушташ манын, школлаште тӱрлӧ йӧным кучылтыт. Шочмо кундемым шымлаш, ача-авам пагалаш, элын эртыме корныжым палаш туныктат. Ятыр вере кадет классым почыт. Йошкар-Оласе 14-ше номеран гимназийыштат тыгай класс уло. Кандашымше кадет классыште тунемше-влак Тимур Федоров, Анастасия Павлова, Елена Романова пеҥгыде койыш-шоктышан кушкыт. Шочмо эл, порылык да чын верч шогаш эре ямде улыт. Шинчымашыштым тӱрлӧ конкурсышто тергат, капкылыштым таҥасымашлаште шуарат. «Ший талешке» шымлыме паша республикысе конференцийышке ушненыт да сеҥыше-влак радамышке лектыныт. Тидлан нуным класс вуйлатышышт Э.Н.Дмитриева кумылаҥда. Нуным снимкыште ужыда.
– Ме школышко кадет формо дене коштына. Моло тунемшылан пример лийшаш улына. Сеҥымашке шуаш тыршена, кугурак-влакым жаплена, шольо-шӱжар-шамычлан полшена, сайын тунемына, – ойлат ӱдыр-рвезе-влак.
Л.НИКОЛАЕВА.
З.Тимофееван фотожо.
