Российна моткоч поян да кумда. Мыняр ола, посёлко, села, ял?! А тушто могай гына калык-влак огыт иле! Кажныжын – ойыртемалтше тӱвыраже, йӱлаже, койыш-шоктышыжо. Лач тидак мемнам пойдара да уша. Икте-весым пагален, пошкудо калык дене пеҥгыде кылым кучен, икте-весылан эҥертен веле ончыко волгыдо корно дене ошкылын кертына. Тӱшка вий дене Шочмо элнам тӱзатена, вияҥдена, пеледалташыже йӧным ыштена. Россий Президент Владимир Путин арам огыл 2026 ийым Калык-влакын икоян улмо идалыкышт семын увертарен.
Школымат изирак эл манаш лиеш. Поснак оласе кугу школышто тӱрлӧ калыкын икшывыже-влак иквереш тунемыт. Йошкар-Оласе 32-шо номеран школат тидын дене ойыртемалтеш. Тушто чылаже 1478 икшыве шинчымашым пога. Руш, марий, татар, удмурт, калмык, армян, грузин, белорус, таджик да моло калык-влакын ӱдыр-эргышт келшен илат.
– Тений, Калык-влакын икоян улмо идалыкыште, ятыр мероприятийым эртараш палемдыме: этноурок, калык-шамычын тӱвыраштым палдарыше модыш, шочмо йылме-влакын форумышт, «Я горжусь своим народом» конференций, калык-влак кокласе патриот слёт да молат. Вес школла денат кылым кучена. Ты фотомат лач тыгай мероприятий годым ыштыме, – ойла директорын туныктымо да воспитаний паша шотышто алмаштышыже В.В.Алексеева.
Тӱрлӧ калык-влак нерген идалык мучко «Келшымаш кӱвар» лаштыкыште палдараш тӱҥалына.
Христина АЛЕКСАНДРОВА.
Иван РЕЧКИНЫН фотожо.
