Никита Перцов Йошкар-Оласе 20-шо номеран школын 7-ше классыштыже тунемеш. Чолга рвезе марий сылнымутлан шӱман. Садлан мӧҥгыштыжат марий книга ятыр. С.Чавайнын «Элнет» романжым поснак лудаш келша. Тушеч ужашым «Живая классика» всероссийский конкурсын оласе йыжыҥыштыже лудын.
– Ачам ден авам шочмо йылмым сайын палат. Ешыштына марла мутланена. Каникуллан я канышлан ялышке унала кошташ йӧратена. Тушто коча-кова-влак дене йылмым палымынам пеҥгыдемдена. Тыге марий йылме урокышто нимогай нелылык дене ом тӱкнӧ. Людмила Иосифовна Шашкован эртарыме урокышко куанен коштам. «Шочмо йылме вӱрышкӧ курымешлан шыҥа. Тудым мондаш огеш лий. Марий сылнымутым шергалаш ида ӧркане. Тушто калыкын эртыме корныжо», – умылтара тудо. Тиде ойым ушыштем эре кучем, – ойла Никита.
