Шочмо йылмын тӱнямбал кечыже вашеш Татарстан Республикысе Микай (М.С.Герасимов) лӱмеш Элнет кыдалаш школышто «Самырык тукым» регион-влак кокласе йоча фестиваль кандашымше гана эртаралтын (снимкыште). Тушто Татарстан Республик Агрыз, Менделеевск, Мензелинск районла, Одо Республик Грак район гыч йоча-влак мурымо, куштымо, почеламутым сылнын лудмо мастарлыкыштым ончыктеныт.
Фестивальын участникше-шамычым Менделеевск районысо образований управленийым вуйлатышын сомылжым жаплан шуктышо Р.Г.Назипов, национальный образований дене методист Э.Р.Гильфанова, Монашево ялшотан илемым вуйлатыше Р.Ф.Иосифов да Менделеевск районысо «Марий-влакын калыкле тӱвыра автономий» верысе мер организацийын председательже Э.А.Савельева саламленыт. Россий калык-влакын икоян улмо идалыкым да Татарстан Республикыште Паша да сарзе чап идалыкым торжественно почыныт. Фестиваль шочмо йылмым, марий калыкын тӱвыражым, йӱлажым арален кодымаште кугун полша манын иктешленыт.
Эльвира ИВАНОВА.
Авторын фотожо.
