Чоныштем куан кумыл озалана. Марий самырык тукым слётыш кокымшо гана миенам. Тений тудо Курыкмарий район Микрӓк кыдалаш школышто эртен да чолга ӱдыр-рвезе-шамычым иквереш чумырен.
16 июльышто корнына Йошкар-Ола гыч Козьмодемьянскыш шуйнен. Слёт В.И.Романов лӱмеш кава йымалсе этнографий тоштерыште почылтын. Вара Микрӓк школыш каенна. Мый «Рвезе жап» лӱман нылымше отрядыште лийынам. Тудым Элеонора Александрова вуйлатен.
Слётын участникше-влаклан поян программым ямдыленыт. Тӱрлӧ студий пашам ыштен. Мый «Марий йылме» секцийым ойырен налынам да курыкмарий йылмым тунемынам. Тыгак эскурсийлаш миенна. Яра жапыште марла муренна, куштенна, тӱрлӧ модыш дене модынна.
Слётышто шуко йолташым муынам. Эше ик шонымашем шукталтын: Никита Козлов (снимкыште ончыл радамыште – кумшо) гармонь дене икмыняр семым шокташ туныктен. Ты мероприятий шинчымашем келгемден, чолгаракым ыштен. Организатор-влаклан тыгай кугу кӱкшытан слётым эртарымыштлан нимучашдымын тауштем.
Марий слёт, марий слёт –
Тиде чынжымак полёт.
Тек умбакыже ила,
Вес ийын ме вашлийына!
Родион НЕБОГАТИКОВ.
У Торъял, Токтарсола.
Фотом слётын архивше гыч налме.
