Вашке У ий пайрем шуэш. Кажне йоча Йӱштӧ Кугыза деч оҥай да ӧрыктарыше пӧлекым вуча. Ача-ава йочан йодмыжым шуктен огыт керт гын, мом ыштыман? Тиде йодышлан Психологий да педагогике, медицине да социальный полышым пуышо «Детство» рӱдерын педагог-психологшо Л.А.ГЛАЗКОВА вашмутым пуа:
– Йоча Йӱштӧ Кугызалан ӱшана гын, серышым ондакрак возаш темлыза. Тыге икшывын шонымашыжым пален налыда, весым темлен ончаш жап лиеш. Мо нерген шонымыжо, молан лач ты пӧлекым вучымыжо нерген йодса. Тидын годым тыгаяк сынан, но вес тӱрлӧ пӧлек лийын кертме нерген умылтарыза. Йоча шонымо пӧлекшымак вуча, но тендан йӧнда уке гын, Йӱштӧ Кугыза деч вашмутан серышым кучыктыза. Тушто тиде пӧлек йоммо нерген тендан шонен лукмо йомакда лийшаш. Йомак-серыш пелен Йӱштӧ Кугызан темлыме пӧлекше-влак нерген сералтыза. Тушеч ик але кок пӧлекым ойыраш лийме нерген умылтарыза. Ньогалан ойыраш неле гын, полшыза. Але Йӱштӧ Кугызан полышкалышыже-влак тек шке гыч пӧлекым кондат манын каласыза.
Йоча у ий пӧлекым ача-ава-влак ыштыме нерген пала гын, окса кушеч толмо, тудым кушко кучылташ лийме, аныклаш кӱлмӧ нерген умылтарыман. Икшыве изинек тидым умыла гын, оксан акшым палаш тунемеш. Шке ыштыме арвер, чон гыч лекше муро але почеламут – эн шерге пӧлек. Тидын нергенат ойлаш ида мондо.
