Кастене пырля каналташ, кечывалым жапым пайдалын эртараш ялыште вер уло гын, калыклан тиде пиал да куан. Теве Волжский район Сотнур селаште шуко функциян тӱвыра рӱдерым кодшо ийын уэмден почыныт. Изи да кугу зал, тоштерлан, ончерлан, тӱрлӧ кружоклан келыштарыме пӧлем-влак, книгагудо – икманаш, пашам ышташ, йоча-влакым тӱрлӧ шӧрыныштӧ вияҥдаш чыла йӧн уло. Рӱдерыште художественный вуйлатышылан Р.А.Яндаков пашам ышта. Кугыеҥ-влакын «Сотнур аршаш» мурышо да йоча-шамычын «Мӧр саска» куштышо ансамбльыштым вуйлата.
– «Мӧр саска» ансамбльыш 2-7-ше класслаште тунемше куд рвезе коштеш. Утларак тӱткышым марий куштымашлан ойырена гынат, моло калыкынымат ӧрдыжеш огына кодо. Куштымаш гоч калыкын тӱвыраж нерген умылтарем. Кажне икшывын мастарлыкшым ужын, шижын моштыман. Икте кушташ йӧрата гын, весылан семӱзгар лишылрак. Сандене рвезе-влакым гармонь дене шокташ, тӱмырым пералташ, трещётко, бубен дене семым сылнештараш туныкташ тӱҥалынам, – ойла Радик Аликович.
Самырык артист-влак «Сотнур аршаш» ансамбль дене пырля районысо, республикысе конкурслаште мастарлыкыштым чӱчкыдын ончыктат.
