Могай мотор мемнан Марий кундемна. Ола-влак калыкын курымашлык историйжым аралат, ял-шамыч тӱвыра поянлыкым перегат, чодыра тӱрлӧ янлыклан, кайыклан поян, вӱд кол-влак дене куандара. Кеҥеж каныш жапыште чылажымат ончал савырныме шуэш. Марий Эл Республикыште туризмым вияҥдыме агентствын консультантше Мария Иванова (снимкыште) каникул жапыште республикын вич эн сылне верышкыже миен толаш темла:
Йошкар-Ола. Республикын рӱдолаштыже йоча-влак дене канаш ятыр кумдыкым келыштарыме. Тиде парк-шамыч, модмо площадке, музей ден тӱрлӧ ончер. Кочмыверат шуко, кажныже шкаланже келшыше сийым муын кертеш.
«Лес Река» глэмпинг. Ты каныме вер Кокшайск селаште верланен. Кугу Какшан да Юл эҥерла воктене йочаланат, кугыеҥланат йӧнан. Йӱдым эртараш изи пӧрт-влак улыт.
Йӱштӧ Кугызан илемже. Шернур кундем Кукнур селаште верланыше илемыште йомакысе кугыза да тудын полышкалышыже-шамыч уна-влакым кеҥежымат вучат.
Юрино. Юл эҥер воктенысе Шереметев замокын моторлыкшым кажне еҥ ужшашак. Полатыште экскурсийым эртарат. Малашат туштак кодаш лиеш. Посёлко мучко коштын савырнаш да тошто купеч пӧртлам шымлаш оҥай.
Козьмодемьянск. Курыкмарий район кава йымалысе этнографий тоштерже дене чаплана. Тушто калыкын йӱлаж ден тӱвыражым, шочмо кундемын историйжым экскурсийым эртарыше-влак тӱрыснек почын пуат.
Оля МАЙКОВА ямдылен.
Фотом еш архив гыч налме.
