Мурызо Сергей Байназовым кӧ огеш пале?! Тудын мурыжым колмеке, кушташ лекде, нигӧ ок чыте. Ачажым ончен, Эрвина ӱдыржӧ мурылан да куштымашлан шӱман кушкеш. Марий лӱман ӱдыр Башкортостан Республикысе Бирск оласе 9-ше номеран школын 4-ше классыштыже шинчымашым пога. Тыгак музыкальный школышто кушташ тунемеш.
– Эрвина йочасадыштак мураш тӱҥалын, но кушташ утларак йӧрата. Константин Зайнетдиновын репертуарже гыч «Икымше сентябрь» мурым икымше гана йоҥгалтарен, – ойла Сергей Александрович.
Эрвинам «Канде кава» группын концертлаштыже чӱчкыдын ужаш лиеш. Ачаж дене дуэт денат мурат. Эрвина мастарлыкшым конкурслаште терга. «Дрит-та-та» муро дене «Оҥгыр йӱк» районысо конкурсышто 2-шо верым налын, «Шанс» тӱнямбал конкурсышто «Икымше сентябрь» муро дене – кумшым.
