Ныл йолан йолташым изинек йӧратыше, полышым пуышо, эмлыше, туткар гыч утарыше йоча-влак, кушкын шумекыштат, ты сомыл деч огыт кораҥ. Теве Йошкар-Оласе 14-ше номеран гимназийын кокымшо классыштыже тунемше Варвара Абатина ветеринар але эколог лияш шона. Тудо Оршанке районысо «Динка» приютышко кажне шуматкечын вашка.
– Приютыш пий-влакым ончаш полшаш кошташ кумылан улмыж нерген ойлымекыже, изиш тургыжланенам. Варя изи, пий-шамыч тӱрлӧ улыт, лӱдыктен кертыт, шоненам. Икана миен толмекше, куан дене темше шинчажым ужмеке, чыла лӱдмаш иканаште шулен. Пийым, пырысым йӧратымаш поро пашалан, мутым кучаш туныкта, – ойла Варян аваже Наталья Абатина.
Варя волонтёр-влак дене пырля приютыш ик ий утла коштеш. Пий-шамычым пукша, уремыш луктеш, пинеге-влак дене модеш. Кандаш ияш зооволонтёр озадыме, суртдымо пий, пырыс-влаклан полыш кидым шуялташ кеч-кунам ямде. Тиде пашалан пырля тунемше йолташыже-влакым кумылаҥда.
– Палымем-влак коклаште ныл йолан йолташым йӧратыше-шамыч шукын улыт. Палем, нуно нигунам осалым огыт ыште. А озадыме, суртдымо пийлан, пырыслан приют-шамыч утларак лийыт гын, эше сайрак ыле, – ойла Варя.
