Еш фотоальбомым шергалмеке, ик фото шинчамлан перныш. Морко район Эҥермучаш ялын шочшыжо-влак, фронтовой кок йолташ Арслан Актуганович Актуганов ден мыйын кугезе кочам Пётр Петрович Петров шогат (снимкыште).
Кугезе кочам 1905 ий 13 декабрьыште шочын. Кугу Ачамланде сарыш кайыме деч ончыч «Молот» колхозышто мӱкшызылан пашам ыштен. 1942 ий 29 январьыште тушман ваштареш кредалаш каен. 1944 ий марте тудо Ленинград фронтышто лийын. Кок ий жапыште кочам ныл гана сусырген. Тудлан «За оборону Ленинграда», «За отвагу» медаль-влакым кучыктеныт. Сарыште улмыж годымак кугезе кочам электромонтёр специальностьлан тунемын. Ленинград олаште электротулым шупшмаште тыршен. Лӱддымылыкым ончыктымыжлан Пётр Петровичлан Йошкар Шӱдыр орденым пуаш пунчалыныт, но кидышкыже кучыктен огытыл.
Эҥермучаш гыч сарыш 23 еҥ каен, кудытшо веле мӧнгеш пӧртылын. Кугезе кочам ден тудын кугурак эргыже Семён Петрович сарыште кредалыныт. Коктынат шочмо суртыш таза капкылан толыныт. Кугезе кочам ден кугезе ковам индеш икшывым ончен куштеныт. Сар деч вара Пётр Петрович колхозышто пашам ыштен. 1985 ийыште Кугу Ачамланде сарын II степенян орденже дене палемдалтын. 1991 ий 16 декабрьыште кугезе кочамын ӱмыржӧ кӱрылтын. Кызыт Эҥермучаш ялжат йомын.
Вероника ПЕТРОВА.
2-шо номеран Морко школ.
Фотом еш архив гыч налме.
