Кушкын толшо тукымым шочмо йылме деке шӱмаҥдымаш, йӱла да тӱвыра дене палымым ыштымаш чонышто кугешныме кумылым луктыт. У Торьял посёлкышто эртаралтше «Творцы и хранители» регион-влак кокласе фестивальыште ойыртемалтше вургемым чийыше-шамычым ужымат, умылышым: Марий Эл гыч огытыл. Лишемын, шомакым вашталтымек, Чебоксар гыч улмыштым пален нальым.
«Кӓмӓл» еш фольклор ансамбль 2011 ийыште Д.Н.Кудряшован тыршымыжлан кӧра шочын. Дина Николаевна лишыл еҥже-влакым поген да ансамбльым чумыраш темлен. Нигӧ тореш лийын огыл. Изижге-кугужге муро ден куштымашлам тунемаш тӱҥалыныт. Репертуарышт калык муро ден куштымашлан поян. Кидышкышт тӱрлӧ семӱзгарым налын шокталтен колтымышт дене кажнын чонжым савырат. Вургемым участник-шамыч шкештак тӱрлат, вуйчием ден сӧрастарышламат шке кид дене ыштат. Тыгодым тушко кугу вашталтышым огыт пурто: ожнысым аралаш тыршат.
«Кӓмӓл» еш ансамбльым чӱчкыдын мероприятийлаш ӱжыт. Усталыкыштым тӱрлӧ конкурс ден фестивальыште тергат. Чуваш Республик деч посна Самара кундемыште, Коми, Марий Эл республиклаште лияшышт пиал шыргыжалын. Кеч-кушко каят гынат, сеҥымаш дене пӧртылыт.
Кызыт ты ансамбльым Д.Н.Кудряшован ӱдыржӧ А.В.Николаева вуйлата. Тушко 2 гыч 70 ияш марте 24 участник коштеш. Икшыве ден уныка-шамыч ача-аваштын, коча-коваштын полшымышт дене еш йӱлам, тӱвырам пален налыт, ончыкыжым чыла тидым аралаш тӱҥалыт.
