Советский район Ӱшнӱр школыш унала мийымеке, тунемше-влак дене вашлийын мутланаш манын, актовый залыште погынышна. Икшыве-шамычлан газетым кучыктымем годым тӱҥалтыш класслам туныктышо Т.И.Иванова воктекем лишеме да каласыш: «Ямде лий» газетым кумшо классыште тунемше-влак чыланат почто гоч налыт». Тидлан мый ондак ӧрым, а вара моткоч йывыртышым.
– Марий йылмым да литературым туныктышо Зинаида Александровна Волкова «Ямде лий» газетлан подписке тургым тӱҥалме нерген увертарыш. Классыште икшыве-влак, вара ача-ава-шамыч дене тидын шотышто каҥашышна. Икмыняр кече гыч тунемше-шамыч квитанцийым кондаш тӱҥальыч. Тыге коло кок ӱдыр-рвезе йоча газетым лудеш. «Ямде лийым» марий йылме, лудшаш уроклаште кучылтына. Лудына, тӱрлӧ заданийым ыштена, – ойла Татьяна Ильинична.
Вашлиймаш деч вара йоча-влак дене лишкырак палыме лияш классышкыштак пурышым. «Ямде лий» газетыште тыланда мо келша?» – йодым. Нуно икте почеш весе кумылын вашешташ тӱҥальыч: «Тушто сӱрет-влак мотор улыт. Мыланна заданийым ышташ келша. Ме почеламутым, кӱчык ойлымашым лудына. Палыме еҥ-влакым кычалына. Вес школысо илыш нерген пален налына. Газет гоч йолташым муаш лиеш».
Мутланыме годымак йоча-влакын возаш кумылышт ылыже. Кузе колтымо нерген йодыч. Тыге кастенак серыш-влак тольыч. Таня Бусыгина вашлиймаш нерген возыш. Юра Царегородцев туштым колтыш. Эвелина Горохова ден Вика Кузьминова сылне сӱретышт дене куандарышт. Моло тунемше-шамыч дечат пашам вучена.
