Школьник-влакын российысе толкынышт 29 октябрьыште шочмо кечыжым пайремлыш. Шым ий теме. Айдемын ийготшо дене таҥастараш гын, тиде школышко кайыше, ум пален налаш тыршыше икшыве. РДШ тыгаяк, тыгодым виян, ӱшаным пуышо. Советский район Ургаш лицейыште тунемше-влак шыже каникулышто лийыныт гынат, йӧратыме толкыныштын пайремышкыже онлайн ушненыт.
– РДШ самырык тукымым уша, ончыко вӱда, уш-акылым пӱсемда, шкем тӱрлӧ могырым вияҥдаш, тӱрлӧ вере канаш, у йолташым муаш йӧным ышта, кумылым нӧлта. Тиде Российыште улшо кугу еш, – ойла лицейыште толкыным вуйлатыше Е.О.Желонкина.
Ургаш лицейыште тунем-ше кумло икшыве Школьник-влакын российысе толкынышкышт ушнен. Нунын коклаште эн чолгаже-влак – Анна Лаптева, Анастасия Герасимова, Эмиль Куклин, Арина ден Полина Алафузовамыт. Ӱдыр-рвезе-влак «Мы – единое целое», «Пионерия на все времена» слётлаште лийыныт, «Я в деле» креативный сессийыш, «Фабрика чудес Деда Мороза» всероссийский проектыш ушненыт. Тылеч посна мыняр мероприятий, мыняр акций?!
– РДШ-лан нимучашдыме кугу таум ойлена. Тек тудын ӱмыржӧ кужу лиеш. Тек толкынышко тале деч тале, уста деч уста йоча-влак ушнат да кугу сеҥымашке шуыт, – ойлат ӱдыр-рвезе-влак.
