Мӧҥгӧ – у шонымаш дене

4-7 ноябрьыште «Кооператор» санаторийыште лидер-влакын «МИГ» республикысе практике школыштын шыжымсе сессийже эртаралтын. Школьник-влакын российысе толкыныштышт чолган пашам ыштыше ӱдыр-рвезе-влак коклаште мыят лийынам. Ме увер дене пашам ышташ, икте-весе коклаште кылым муын мошташ тунемынна. Спорт таҥасымашлаште вийнам тергенна. Тӱрлӧ модыш дене модынна, квестым эртенна. Келшымаш, шочмо кундем нерген мурым муренна. Тӱҥжӧ – лидер койышнам утларак вияҥденна. Шуко у йолташым муынна. Мӧҥгӧ у шонымаш дене пӧртылынна.

Анна ЭЛЬТЕРОВА.

2-шо номеран Кужэҥер школ.