Усталык школышто кажне еҥ дене вашлиймаш поро кышам коден. Мемнан дек унала Марий Эл Республикысе тӱвыра, печать да калык-влакын пашашт шотышто министрын алмаштышыже М.И.Матвеев, Марий Эл Республикысе Кугыжаныш Погынын депутатше Н.В.Пушкина, «Марий Эл» увер агентстве» кугыжаныш автоном тӧнеж вуйлатышын алмаштышыже А.С.Абдулов, Печать да тӱшка увер пӧлкан тӱҥ специалистше В.Э.Комаров да тӱрлӧ газет-шамычын тӱҥ редакторышт толыныт. Нуно юнкор пагытыштым шарналтеныт, пашашт дене палдареныт. Мемнан йодышланна вашмутым пуэныт. Мыланна «Марий юнкор» манын возыман футболкым чиктеныт. Мый да йолташем-шамыч нунылан почеламутым сылнын лудынна. Вара оҥгыш шогалынна, Аня Андреева мурым мурен. Тидыже юнкор-влакын икоян еш гай улмыштым пеҥгыдемден.
Карина ГОРДЕЕВА.
Параньга, Матародо.
