У Торъял районысо Кузнеч тӱҥ школ мотор пеледыш коклаште верланен. Школыш пурымек, шып, тымык. Класслаште урок кая. Мемнам школ директор Т.И.Егошина вашлие. – Тений 33 тунемше парт коклашке шинчын, – ойла Татьяна Изосимовна. – Куандара, «Ямде лийым» йоча-влак палат, газетыш возышо-шамычат улыт. Ик жап гыч чыланат школ коридорыш погынышт. Газетын историйже дене палдарыше оҥай вашлиймаш шижде эртен кайыш. Мо оҥайже, Кузнеч школыш тений икымше классыш ик рвезе веле – Дмитрий Калинин – толын. Индешымше классыште ныл эрге тунемеш: Кирилл Басов, Адриан Соловьёв, Артём Басов, Максим Яшметов. Тек кугурак класслаште тунемше-влак кумда шинчымаш тӱняш икымше ошкылым ыштыше Дималан пример лийыт. Снимкыште: 9-ше классыште тунемше-влак да Дмитрий Калинин туныктышыжо В.И.Фёдорова дене пырля.
