Икшывыда икымше гана парт коклашке шинчеш. Могай шижмаш чоныштыда озалана? Школлан ямде улыда?
М.Шкетан лӱмеш Марий национальный драме театрын артистше Марина ВОРОНЦОВА:
– Чон моткоч тургыжлана. Ик классыште 30 йоча лиеш. Кузе ӱдырем тунемаш тӱҥалеш? Йоча-влак туныктышым умылен шуктат мо? Нине йодыш-шамыч ушышто пӧрдыт. Школлан кӱлеш арверым наледена, книгам лудына. Мирославан кумылжо нӧлталтше. Но мо тыгай школ, эше огеш умыло, очыни. Икымше классыш кайыше икшыве-влакым уло кумылын саламлем. Пӱсӧ ушан лияш, тыршен тунемаш тыланем. Туныктышын мутшым колыштса!
Республикысе курчак театрын художественный вуйлатышыже Алексей ЯМАЕВ:
– Аня ӱдырна Иван Степанович Палантай лӱмеш тӱвыра да сымыктыш колледжын национальный сымыктыш гимназийжын художественный пӧлкашкыже тунемаш пурен. Ончыкылык сӱретче-дизайнерым кушташ тӱҥалына. Тунемме арверым, вургемым ончылгоч ямдыленна. Кугу тургыжланымашым огына шиж. Школ келша, шуко туныктышо дене шукертак палыме улына. Ӱдырнан классыштыже йочасадыш пырля коштшо кок йолташ ӱдыржӧ лиеш.
