Поэтессе, Россий писатель ушемын еҥже, Морко район Ӱшӱттӱр ялын ӱдыржӧ З.А.ТИМОФЕЕВА-ВИСВИС 31 августышто 55 ийым тема. Тудын дене шинчаваш кутырышна.
– Зоя Александровна, сылнымутлан школышто тунеммыда годым шӱмаҥында, очыни.
– Морко районысо Изнур школышто 5-ше классыште тунеммем годым теле нерген почеламут шочын. Тудым тетрадьышкем пыштенам да серышемым марий йылмым да литературым туныктышо Елизавета Егоровна Кудряшова ужын. Сылнымут кружокышко кошташ темлен. Пашам-влак «Ямде лий» газетыште савыкталтыныт. Газетыште шке лӱмемым ужаш эре кугу куан лийын. Туныктышем класс ончылно тидын нерген ойлен. «Ямде лий» газет гыч Валентин Исенеков серышым чӱчкыдын серен. Тиде кыртмен пашам ышташ да сылнымут корно дене ӱшанлын ошкылаш таратен.
– Умбакыже мастарлыкдам кушто таптенда? Сылнымут корныштыда кӧ шӱкалтышым ыштен?
– Н.К.Крупская лӱмеш пединститутым тунем пытарымеке, йочасадыште тыршенам. Усталык шӱлышан улмемым шижыныт да ик заводын тӱшкагудышкыжо воспитательлан пашам ышташ темленыт. Мый творческий еҥ-влак дене вашлиймашым эртаренам. Нунын чон йӱлен каласкалымыштым колыштын, сылнымутлан утларак шӱмаҥынам. Марий серызе-влак Вячеслав Абукаев ден Геннадий Пирогов газетыште журналист семын вийым терген ончаш темленыт. «Кугарня» газетыште пашам ыштымем поэзийыште кугу шӱкалтышым ыштен. Кызыт пашам рекламе дене кылдалтын гынат, тӱрлӧ темылан статьям возем да «Поэзий унагудо» вияш эфирым эртарем.
– Тендам кызыт Зоя Висвис семын палена. Молан тыгай шоялӱмым налында?
– Почеламутем-влакым «Марий Эл» газетышке колтылынам. Тунам тушто пашам ыштыше писатель Юрий Галютин шоялӱм дене савыкталташ темлен. Ик кастене шуко жап шонен шинчымемым ӱдырем шекланен шуктен. Мом шонкалымем нерген ойлымекем, ӱмбакем тӱткын ончен да «Висвис» псевдонимым пуэн.
– Те почеламут деч посна ойлымашымат, мыскарамат возеда. Но поэзий утларак лишыл. Поэзий – тиде мо тыланда?
– Тиде шӱм-чонышто улшо шижмашем, илыш умылымашем. Почеламут корныла дене ойгемым, куанемым почын ончыктем. Поэзий – мыйын йолташем. Кеч-кунамат мый тудын деке эҥертем.
– Те кугыеҥ-влаклан ятыр сылнымутым пӧлекледа. Йоча-шамычлан возаш кумыл уке?
– Йоча-влаклан пӧлеклалтше икмыняр почеламут савыкталтын. Уныкамлан корнылам возем да лудам. Тудо шкежат изирак почеламут-влакым шонаш тӱҥалын.
– Юбилейда лишемеш. У книга дене куандареда, очыни.
– Усталык касым эртарынем ыле. Пандемий чаракым ыштыш. Лишыл жапыште «Шӱмбел Ӱшӱт воктене» у книгам лекшаш. Тушко илыш, пӱртӱс, шочмо кундем, йӧратымаш нерген мыскара сынан почеламут-влакым пуртымо. Муро-влакын шомакыштымат лудаш лиеш.
– Самырык возкалыше-влаклан мом тыланеда?
– Почеламутым але ойлымашым возеда гын, марий йылме да литератур дене туныктышылан ончыкташ ида ӧр. Газет ден журналлашке Интернет йӧн дене колташ лиеш. Шкем тергаш кызыт шуко йӧн уло.
