У технологий илышышке шыҥенак пура. Ушан колонко да тӱрлӧ технике сурт кокласе сомылым куштылемдат, уш-акылым пойдарат. Нуным пайдалын кучылт моштымаш – тиде ик паша. Тыгак кузе ышталтмыжым, тӱҥ паша принципшым палыман. Теве Морко районысо Нурӱмбал кыдалаш школышто тунемше йоча-влак робототехнике дене лишкырак палыме лийыт. Тидыже ончыкылык профессийым ойырымаштат пайдам пуа.
«Образований» национальный проектын «Успех каждого ребёнка» федерал проектше радамыште «Создание новых мест дополнительного образования детей» мероприятий школышто робототехнике кружокым почаш амалым ыштен. Тудын кӱшеш тӱрлӧ оборудованийым налыныт. Школышто кок кружок пашам ышта, тушко 30 йоча коштеш. Икымше да кокымшо класслаште тунемше-влакым А.А.Ильин туныкта, а кумшо да нылымше класслам – Л.И.Тимофеева. Занятий жапыште ӱдыр-рвезе-шамыч роботехнике дене палыме лийыт, у шинчымашым налыт да, тудым кучылтын, тӱрлӧ механизм-влакым погат.
– Нурӱмбал школ моло туныктымо тӧнеж дене иктӧр ошкылеш. Ме кугу пашам ыштена: у саманын йодмыжым шуктен, йоча-влакым ончыкылык илышлан ямдылена. У технологийым кучылт моштыде, илыш дене тӧр ошкылаш куштылгыжак огыл, – ойла Александр Альбертович Ильин.
Кружокыш поснак эрге-шамыч кошташ йӧратат, ӱдыр-влакат почеш огыт код. Иван Тимофеев, Артём Светлаков, Азат Хабибрахманов, Ангелина Ухова да Даша Сергеева поснак чолга улыт. Тунемме ий мучашыште школышто робототехнике таҥасымаш икымше гана эртаралтын. Тушто тунемше, туныктышо-влак кружокын паша лектышыжым ончыктеныт да сеҥымашыштлан йывыртеныт.
Катя СЕРГЕЕВА.
Фотом школ архив гыч налме.
