Йоча-влак, садерыште, чодыраште кажне пушеҥгын ойыртемжым эскереда, южым яндаремдымыштлан тауштеда, очыни. Нунын миниатюрышт мӧҥгыштӧ икмыняр ий дене илен да эре ужарге шоген кертеш манын ӱшанеда? Бонсай, моссариум нерген колында? Уке гын, палдарем. Тӱрлӧ йодышым рашемдаш Йошкар-Ола гыч цветовод Н.П.Чернобровкина (снимкыште) полша.
– Надежда Пантелеевна, бонсай ден моссариум мо тыгай улыт?
– Бонсай – пушеҥгым куштымо йӧн. Тудын полшымыж дене кугу пушеҥгын миниатюрыжым ыштат. «Моссариум» шомак англичан «moss» мут гыч шочын, регенче манме лиеш. Тиде флорариум, илыше регенчым кучылтын ямдылыме композиций. А флорариум – лӱмын келыштарыме петырыме янда (але вес материал) ате.
– Изи пушеҥге-влакым кузе куштыман?
– Тиде шуко вийым да жапым налше шкешотан сымыктыш. Ик, кок ий кӱлеш, южгунам луат. Нӧшмӧ але укш гыч, тыгак питомникыште налме ямде кушкыл гыч кушташ лиеш. Мутлан, пӱнчӧ, кож, лӱмегож, мирт, европейский олива, гибискус, крассула гыч бонсайым ышташ йӧн уло.
– Бонсай кугу пушеҥге семынак лышташым йоктара?
– Лышташым йоктарыше пушеҥгым ойыреда гын, тыге лиеш. Нуно ик жап «малат». Пӧлемысым налыда — идалык мучко ужар тӱсшӧ дене куандараш тӱҥалеш. Мутлан, фикус бенджамина урлык гыч Вианди сортым, тыгак крассула-толстянкам. А иман пушеҥгылан келшыше температур кӱлеш. Телым уремыште шогыктыман. Пӧлемыште гын, 5-15 градус леве веле лийшаш. Мутлан, регенче икмыняр ий дене илыже манын, вӱдшым кораҥдем, тудын олмеш глицериным ешарем. Вара тудлан вӱдат, волгыдат огыт кӱл. Айдеме ден мӧҥгысӧ янлыклан йӧршын лӱдыкшыдымӧ.
– Бонсай тазалыклан пайдале манын колынам.
– Изи пушеҥге-влак ден регенче южым неле металл деч эрыктат, кислородым луктыт. Суртышто илыше-влаклан пиалым, перкем, лидер койышым ешарат, вурседылмаш деч утарат. Бонсайым куанен ончен, еҥ-шамыч чоныштым лыпландарат, пӱртӱс лоҥгаште улмышт гаяк чучеш.
Христина АЛЕКСАНДРОВА мутланен.
Фотом еш архив гыч налме.
