«Движение Первых» йоча толкын чолга ӱдыр-рвезе-влакым иквереш уша. Тудын радамыш пурышо-шамычын чотышт ий гыч ийыш ешаралтеш. Йоча-влак пырля ятыр поро пашам ыштат, кугыеҥ-шамычлан тӱрлӧ мероприятийым эртарымаште полшат, вийыштым, уш-акылыштым конкурслаште тергат.
Шукерте огыл толкынын Марий Элысе пӧлкаже-влакын идалык мучко кыртмен пашам ыштымыштым «Премия Первых» конкурсышто иктешленыт. Курыкмарий район Эмӓн школысо пӧлкам «Первичный отделенийын эн сай командыже» семын палемденыт. 2-шо номеран Шернур школ «Первичное отделение года» номинацийыште икымше верым сеҥен налын. Чолга ӱдыррвезе-влакым снимкыште ужыда. Ты школышто пашам ыштыше Снежана Николаевна Власова «Эн сай куратор» лийын, а Марий Турек район Косолап школышто тыршыше Ирина Михайловна Богданова – «Наставник года». «Лучший Совет Первых местного отделения» лӱм дене Советский районысо ӱдыр-рвезе-влак суапландаралтыныт. «Идалыкын ешыже» номинацийыште Козьмодемьянск гыч Ерофеевмыт сеҥеныт. Марий Элысе йоча да самырык-влаклан «Лӱдыкшыдымылык школ» мер толкын «Партнёр года» таҥасыште ойыртемалтын.
— Шуктен шогымо сомылем кӱкшын аклымылан тауштем. Сеҥымашлан школышто тунемше ӱдыр-рвезе-влакат моткоч йывыртеныт. Нуно толкынын эртарыме кажне мероприятийышке ушнат. Поро кумылым ончыктымо пашам шуктат, тӱвыра да сымыктыш, патриотизм темыла дене кылдалтше пайремлаште чолга улыт, спорт дене кылым кучат, – палдара С.Н.Власова (снимкыште).
Фотом еш архив гыч налме.
Н.А.Заболоцкий лӱмеш 2-шо номеран Шернур школышто «Движение Первых» толкын 2023 ий 14 апрельыште почылтын. «Орлята России», «Юные инспектора движения», «Юнармия» отряд-влакым, «Служу Отечеству» сарзе-патриот клубым, «От сердца к сердцу» поро кумылым ончыктымо ушемым иктеш чумырен. Эртыше ий поснак лектышан лийын. Школ пеленысе «Драмтешка» театр «Первые роли» республикысе фестиваль-конкурсышто кок ий почела 1-ше верым налын. «Грация» куштышо коллектив «Российская школьная весна» фестивальыште Марий Элын чапшым арален, ты фестивальыштак «Ужар чодыран мландем» мурыж дене Злата Васильева ойыртемалтын. Сеҥымаш ятыр. Толкынын активистше-шамыч арняште кок гана погынат, ончыкылык паша радамым каҥашат.
Ӱдыр-рвезе-влаклан тыгаяк чолга, уста, виян лияш тыланена. Сеҥымашда дене «Ямде лий» газет гоч умбакыжат палдарыза.
Оля МАЙКОВА.
Фотом школ архив гыч налме.
