Наркотик ваштареш улмо тыгай форум Марий Эл Республикысе самырык тукымым кумшо гана чумыра. Тудо 15 ноябрь гыч 2 декабрь марте эртаралтше «Бей в набат!» акций радамыште лиеш. Форумын тӱҥ шонымашыже – самырык тукымым таза илыш-йӱла верч шогаш кумылаҥдымаш, наркотикын зиянжым умылтарымаш. Кандаш тематике площадке пашам ышта. 25-27 ноябрьыште волонтёр-влак «Авангард» военно-патриотический рӱдерыш республикысе слётыш чумыргат. Тыгак семинар, конференций, вашлиймаш-влак эртаралтыт. Форумын пашашкыже ача-ава-шамыч ушнен кертыт.
Марий Эл Республикысе МВД-н Наркотик кучылтмым тергыше управленийын пӧлка вуйлатышыже Н.Г.Отмахован ойлымыж почеш, кодшо ийын ты аярлан кӧра 31 еҥын ӱмыржӧ кӱрылтын. Нунын коклаште ийготыш шудымо йоча-влакат лийыныт. «Наркотикым шаркалыше-влак утларакше самырык-шамычым аярым ужалаш кумылаҥдат. Оксам куштылгын ыштен налаш темлат. Нигунам кӧныман огыл! Шарныза, кӧн кидышкыже наркотик логалеш, тудо преступникыш савырна», – ойла Наталья Геннадьевна.