Кумло ий иктымак ышташ шагал але шуко? Чоным пыштен ыштыше, шке пашам йӧратыше еҥлан пел курымжат шижде эртымыла чучеш, очыни. Башкортостан Республик Мишкан район Лепешкан школышто тӱҥалтыш класслам туныктышо Татьяна Сайдиевна Аптыкаева икшыве-влакым ава семын кумло ий вӱчкен вашлиеш. Шинчымашым пуэн, чын корным ойыраш полша.
– Мый икымше ден кумшо класслам туныктем. Тений ныл ӱдыр икымше гана парт коклашке шинчын. Нунылан шинчымаш тӱняшке икымше ошкылым ышташ кумшо классыште тунемше ӱдыр-рвезе-влак полшат. Урок деч вара мӧҥгысӧ пашам ыштат, тӱрлӧ конкурслан пырля ямдылалтыт. Тыге, икте-весылан эҥертен, кажне кечын шинчымаш нурым куралын, ончыко каена, – ойла туныктышо.
Школышто марий йылмым шочмо йылме семын тунемыт. Т.С.Аптыкаева марий сылнымутлан, йылмын поянлыкшылан кугу тӱткышым ойыра. Ӱдыр-рвезе-влак марла сайын кутырат. Мастарлыкыштым тергаш тӱрлӧ конкурсыш ушнат.
– Йоча-влаклан шочмо йылмын кӱлешлыкше нерген эре ойлем. Икшыве-шамыч шочмо йылмым, тӱвырам ынышт мондо манын, мероприятийлам марла эртарена. Мурена, куштымашым шындена, почеламутым лудына. Кажне йочан марий вургемже уло. Шукерте огыл «Шочмо эл» районысо конкурс эртаралтын. Икымше классыште тунемше Алёна Александрова Семён Вишневскийын «Шочмо мланде» почеламутшым лудын да кокымшо верыш лектын, – ойла Татьяна Сайдиевна.
