Марий Элысе кажне гаяк школышто Школьник-влакын российысе толкынышт пашам ышта. Кужэҥер район Руш Шой школыштат илыш куткышуэ семын шолеш. Тиде толкын уста туныктышо ден 5-11-ше классласе чолга тунемше-влакым ушен. Кураторышт – директорын воспитаний паша шотышто алмаштышыже Н.Г.Иванова. Тудо кушкын толшо тукымым айдеме семын шуараш тырша, шочмо элым йӧраташ туныкта, мер пашашке ушнаш тарата.
– Ӱдыр-рвезе-влак чылан чолга улыт. Но нунын коклаште лидер-шамычым палемдыде ок лий. Тиде Ольга ден Полина Макаровамыт, Тамара Кудрявцева, Ольга Домрачева, Анна Крылова, Дина Платунова, Анна Петрова, Никита Куклин, Артур Пудов. Нуно школышто тӱрлӧ мероприятийым, акцийым, флешмобым эртараш полшат, – ойла Надежда Геннадьевна.
Паша лектышышт изи огыл. Школьник-влакын российысе толкыныштын эртарыме слётышкышт ий еда ушнат. Ӱмаште «Медиахакатон РДШ» фестивальыште районын чапшым араленыт. «РДШ – Территория самоуправления» всероссийский конкурсышто мастарлыкыштым ончыктеныт. «Мы команда РДШ Республики Марий Эл» республикысе конкурсышто кокымшо лийыныт. Сертификатыштым шотлен от пытаре!
– РДШ йоча-влаклан шкеныштым тӱрлӧ аланыште тергаш йӧным ышта. Тыште кажне еҥ чонжылан келшыше пашам муын кертеш. Шукынжо организатор семынат кушкыт, – ойла Надежда Геннадьевна.
Илыш куткышуэ семын шолеш
