Марий сылнымутлан негызым пыштыше С.Г.Чавайнын шочмо кечыжлан пӧлеклалтше пайрем Морко йоча книгагудышто кажне ийын эртаралтеш. Сылнымут пайремым Морко рӱдӧ книгагудо пеленысе «Морко памаш» клубын участникше-влак почыныт. Нуно С.Г.Чавайнын «Шӱдӧ теҥге олно» пьесыж гыч ужашым модын ончыктеныт.
Тений почеламутым сулнын лудмо конкурсышко 43 тунемше ушнен. Нуно марла да рушла лудмаш номинацийлаште аклалтыныт. Ийготым шотыш налын, рушла лудмаште икымше верым Анна Мерзлякова (7-ше номеран Морко йочасад), Даниил Ситников, Асия Хасанова (1-ше номеран Морко школ) сеҥен налыныт. Марла лудшо-влак коклаште Елизавета Иванова (5-ше номеран Морко йочасад), Варвара Дигина (1-ше номеран Морко школ), Регина Григорьева (2-шо номеран Морко школ) ойыртемалтыныт.
Сергей Григорьевичын сылнымутшым самырык тукым пала да акла. Тудын мутшо уш-акылым вияҥда, ӱшаным пуа.
И.КУДРЯШОВА, тӱҥ библиограф.
Снимкыште: сеҥыше-влакым саламлымаш.
Фотом книгагудын архивше гыч налме.
