Туныктышо пашам арам огыл призваний маныт. Кажне еҥ, тиде профессийым ойырен, ӱмыржӧ мучко ыштен ок керт. А пӱралтын гын, ок лий кораҥаш. Лач тыгай пӱрымашан туныктышылан Маргарита Николаевна Савельевам шотлыман. Тудо Кужэҥер район Шӱдымарий школышто кумло ий пашам ышта.
Эн ончыч старший вожатый лийын. Ты жапыштак Н.К.Крупская лӱмеш Марий кугыжаныш педагогический институтышто заочно тунемын. Йоча шуко улмылан кӧра тудлан марий йылме ден литературым туныкташ ӱшаненыт. Кызытат тиде предметым вӱда, 9-ше классын вуйлатышыжлан шотлалтеш. Тыгак труд урокым туныкта. М.Н.Савельеван паша лектышыже куандарыше. Тунемшыже-шамыч марий йылме да литератур дене олимпиадылаште ий еда келге шинчымашым ончыктат. Уста туныктышо урокым эртарымаште у йӧн-влакым кучылтеш. Ешартыш опытым налаш манын, конференцийлашке коштеш, конкурслашке ушна. 2018 ийыште «Идалыкын туныктышыжо» конкурсын районысо йыжыҥыштыже марий йылмым туныктышо-шамыч коклаште сеҥышыш лектын. 2023 ийыште тудлан Российысе Просвещений министерствын Чап грамотыжым кучыктеныт.
Школ деч вара М.Н.Савельева жапшым кидпашалан ойыра. Тувырым урга, тӱрла да пидеш. Тувыржо-влакым тӱрлӧ мастер-классыште ончыкта.
– Илышыште шке верем муынам манын, пеҥгыдын каласен кертам, – ойла Маргарита Николаевна. – Мо чонемлан келша – чылажат Шӱдымарий дене кылдалтын. Садлан пашашкат уло кумылын коштам.
Авторын фотожо.
