Марий Турек район Арбор кундем Памашъялын эргыже Денис Петров спортлан изиж годымак шӱмаҥын. Тений тудо визымше классым тунем пытарен. Вич ий жапыште ятыр грамот да диплом деч посна шотлен пытарыдыме медальже погынен. Денислан спортын чыла видшат келша, но туризм эн чот лишыл. Тидлан тудым тренер, физкультурым туныктышо Людмила Николаевна Семёнова шӱмаҥден. Изирак класслаште тунеммыж годым рвезе кружокыш коштын, туризм дене тӱҥалтыш шинчымашым налын, ты спорт дене лишкырак палыме лийын. А визымше классыште тудым тренировко ден таҥасымашла вученыт. Урок деч вара кодын, кажне таҥасымашлан чот ямдылалтыт. Тыршымышт арам огыл: команде дене сеҥыше-влак радамыш чӱчкыдын лектыт. Мутлан, «Сосновая роща» тунемме да тренировкым эртарыме базыште «Лӱдыкшыдымылык школ» республикысе таҥасымаш май мучаште эртаралтын. Туштат чулымлыкыштым, писылыкыштым ончыктен, команде дене кокымшо верым сеҥен налыныт.
«Туризм капкылым веле огыл шуара, тӱрлӧ нелылык лекме годым йӧным муын мошташ туныкта. Мутлан, кид йымалне нимо уке годым консерве банкым кузе почман але шырпе вӱдыштат йӱлыжӧ манын, мом ышыман… Тидым туризм кружокышто пален налынам. Чылажат илышыште кӱлеш лиеш. Тренерем Людмила Николаевналан тауштем», – ойла рвезе.
Денисын акаж ден изаже спортлан шӱман улыт. Розалия туризм дене кылым кучен, ятыр медальже погынен. Алексе – тале футболист. Тугеже нуно шольыштлан чын пример улыт. Ака-изам ончен, Денис кӱкшӧ сеҥымашке шуэш.
