Ешын идалыкше уста еҥ-влакым тӱрлӧ мероприятийыш уша. Пайремлаште чолга ешым ужын, кугешнаш веле кодеш. Медведево район Пурсанур села гыч Л.Л.Москалева дене Калык тӱвыра пӧртыштӧ эртаралтше Ӱярня пайремыште палыме лийынна. Лариса Леонидовна Йошкар-Оласе 21-ше номеран Семёновка школышто англичан йылмым туныкта. Алексей пелашыж дене кок икшывым ончен куштат. «Всей семьёй» российысе проектыш ушнышо икоян еш шинчалан вигак пернен. 4-ше классыште тунемше Матвей эргыже шке кид дене ыштыме марий вургеман изи курчак-влакым да моло поделкым ончыктен. Икшывын кок коважат кажне модмашыш, куштымашыш кумылын ушнен. Пеленышт кондымо вужга мелнаштым эре кочмет веле шуэш. Снеге варенье дене мемнамат сийленыт.
– Пырля келшен илымаш кеч-кунамат сеҥымашыш шуаш полша да ончыкылыклан ӱшаным шочыкта. Мӧҥгыштӧ пашам чылан каҥашен ыштена. Пакчана уло. Тӱрлӧ кушкылым, вожсаскам, киярым, пеледышым шындылынна. Кеҥежым коча-кова-влак дене пӱртӱсыш лекташ йӧратена. Эрден эрак кынелын, чодыраш поҥгым погаш каена. Пайремым родо-тукым дене пырля веселан эртарена. Мыйынат, пелашемынат авана-влак уста койыш-шоктышан улыт. Унала толмышт годым тӱрлӧ вел такмакым шергылтарен, марий койышым ончыктат да кумылым ылыжтат. Мемнан дене пырля конкурслашкат кумылын ушнат. «Изба» ООО-н эртарыме «Чучела Масленицы – 2022», «Масленица-Берегиня – 2023» конкурслаште участвоватленна да сеҥышыш лектынна. Марий орнамент дене сӧрастарен, оҥгырым ыштенна, Ӱярня кувалан вургемым ямдыленна. Ешыште тиде пайрем ынде йӱлаш пурен, манаш лиеш. Мыланем мероприятийлашке изинек ушнаш келшен. Концертлаштат мастарлыкем чӱчкыдын ончыктенам. Кызыт икшывем-влакым кумылаҥдем, – ойла Лариса Леонидовна.
Москалевмытын ешыште Елизавета ӱдырыштат уста койыш-шоктышан кушкеш. Тений 8-ше классым тунем пытарен. Семёновкысо йоча сымыктыш школыш коштеш, фортепиано дене сайын шокта. Кажне ийын сеҥымаш дене ойыртемалтеш. Пайремлаште марий мурым йоҥгалтарымыж дене калыкым куандара. Тудо тӱрлӧ шӧрыныштӧ шкенжым терга. 2023 ийыште «Большая перемена» всероссийский конкурсышто участвоватлен да 5-7-ше класслаште тунемше-влак коклаште сеҥышыш лектын. «Артек» тӱнямбал йоча рӱдерыште ты таҥасымашым иктешлыше фестивальыште лийын.
– Фестиваль поро шарнымашым коден. Мероприятий шуко самырык тукымым ушен. Ме икте-весе дене палыме лийынна. Театрлашке, шуко вере экскурсий дене коштыктеныт, мастер-классым эртареныт, лекций-влакым лудыныт. Тӱрлӧ калыкын йӱлаже, тӱвыраж дене палыме лияш йӧн пуалтын. Калык кочкышым тамлен онченна, – каласкала Елизавета.
Л.Л.Москалева 20 ий наре образований аланыште пашам ышта. Уста туныктышо тале организатор семын шкенжым ончыкта. Самырык тукымлан ешартыш шинчымашым пуымо шотыштат кӱлын тырша. Ӱдыр-рвезе-влакым чодыра паша дене палымым ышта: школ лесничестве кружокым вӱда, 36 ӱдыр-рвезым иквереш ушен. Шуктен шогымо сомылжо кажне ийын у кӱкшыт дене чаплана. Тунемше-шамыч дене пырля шымлыме пашам эртарат, проектлашке ушнат да сеҥышыш лектыт. Нунылан «Орлёнок» всероссийский йоча рӱдерыш путёвкым кокымшо ий почела ойыреныт. Лишыл жапыште кайышаш улыт.
Тыгай ешын тыршымашыжым, сеҥымашыжым ужын, чон куана да кумыл нӧлталтеш.
З.ТИМОФЕЕВА.
