Кужу каныш годым класс дене Оршанке районысо Кугунур селаш унала миенна. Тушто мемнам имньым ашныше, ойыртемалтше, моткоч поро да весела еш шокшын вашлийын. Эн ондак имне да чома-шамыч дене палымым ыштеныт, экскурсийым эртареныт. Нуным пукшаш пеш куанле лийын. Кидна гыч кешырым, олмам да сакырым тамлен-тамлен кочкыныт. Тидын деч вара эн оҥайже вучен: ӱдыр-рвезе-шамыч имне дене черет дене кудалыштынна. Южыжо имне ӱмбаке икымше гана шинчын, садлан лӱдыкшыракын чучын. Мый шкемым тыматлын кученам.
Мыланна Оршанке кундемыш миен толмына чот келшен. Оза-влаклан тыгай ойыртемалтше вольыкым – имньым, лишычын ужаш, ниялташ, пукшаш да кудалышташ йӧным пуымыштлан кугу таум ойлена.
Снимкыште: Ульяна Щербакова.
Анна ЕГОШИНА.
У Торъял школ.