Богдана ден Данила Коротковмыт иза-шӱжар улыт. Данила Юлтех кугыжаныш университет пеленысе «Политехник» колледжыште программистлан тунемеш. Богдана Йошкар-Олаште 16-шо номеран школышто 9-ше классыште шинчымашым пога. Коктынат шочмо йылмын, тӱвыран поянлыкшым, кӱлешлыкшым умылен кушкыт.
Уста икшыве-влак Светлана Яндукован вуйлатыме «Юкече» вокал ансамбльыш 2015 ий гыч коштыт. Данила кодшо ийын «Ший памаш» регион-влак кокласе фестиваль-конкурсышто икымше гана участвоватлен да «Шӱмбел авай» (мутшо Зоя Висвисын, семже Светлана Яндукован) у муро дене сеҥыше радамыш лектын. Шукерте огыл «Струны души» регион-влак кокласе IV фестиваль-конкурсышто II степенян лауреат лӱмым сеҥен налын.
Тений Богдана ден Данила Коротковмыт «Кушто-кушто куштымаш» у произведенийым луктыныт. Тудым Светлана Яндукован проектше негызеш ямдылыме. Сем аланыште кок у шӱдыр тек ончыкыжымат мемнам у муро-влак дене куандара.
З.ТИМОФЕЕВА.
