23 октябрьыште «Хрустальные звёздочки» XVII тӱнямбал фестиваль-конкурс иктешлалтын. Тудым Судебный пристав-влакын федерал службышт кажне ийын эртара. Конкурс икмыняр йыжыҥлан пайлалтын. Ончыч участник-влак мастарлыкыштым шочмо кундемыштышт тергеныт. Ойыртемалтше-шамыч Сочиште концертым ончыктеныт. Варажым 28 йоча Москошто усталыкшым терген. Марий Эл гыч Анастасия Мусина ты конкурсышто «вокал» номинацийыште таҥасен. Изирак ийготан-влак коклаште 3-шо верым сеҥен налын. Ӱдыр шкенжым чолган ончыктен. Садлан тудлан Сочиште концертым да Москошто гала-концертым вӱдаш ӱшаненыт.
Настя Йошкар-Оласе 31-ше номеран школышто 5-ше «Б» классыште тунемеш. Яра жапыште йомакым да лийдыме историй-влакым шонкалаш йӧрата.
– Фестиваль мыланем пеш келшен. Тушко шуко ӱдыр-рвезе ушнен. Южыж дене ты кӱчык жапыште йолташ лийынна. Фестивальын кумшо йыжыҥже поснак шарнымашеш кодын. Тудо Сириус кумдыкышто эртаралтын. Шем теҥыз воктене тӱрлӧ мастер-класс, Российын сулло артистше-влак дене вашлиймашла лийыныт. Нуно сценыште кузе шкем чын кучаш ой-каҥашым пуэныт, – ойла ӱдыр.
Фотом еш архив гыч налме.
