Одо кундем Ныргындыш тӱвыра пӧрт пелен тӱрлӧ ийготан йоча-шамычлан келыштарыме «Ӱдыр ден рвезе-влакын республикышт» ушем пашам ышта. Тушко 15 марий йоча коштеш.
– Ты ушемыште кажныже шкалан келшыше сомылым муын кертеш. Уста шӱлышанлан ме сӱретлаш, мураш, кушташ, пластилин але шун гыч ненчаш, театр студийыште мастарлыкым вияҥдаш йӧным ыштена. Спорт дене кылым кучышо-шамыч тӱшка модмашыш, таҥасымашыш кумылын ушнат. Проектым возат. Тыгак тунемше-влак тӱрлӧ мероприятийыште волонтёр семын пашам ыштат. Изирак ийготан икшывылан, коча-ковалан кертмышт семын полшат, – ойла «Ӱдыр ден рвезе-влакын республикышт» ушем вуйлатыше Ангелина Алексеевна Тимофеева. Тудо Ныргындыш тӱвыра пӧртыштӧ йоча да самырык-шамыч дене пашам ышта, икмыняр кружокым вӱда.
– Икымше классыште тунеммем годымак ушемыш ушненам. Ончыч куштымаште мастарлыкым погенам, кызыт актёр семын вияҥам. Сценыште выступатлаш, тӱрлӧ рольым модаш йӧратем. Ушемыште мыланна тӱрлӧ квестым, мастер-классым, конкурсым, вашлиймашым чӱчкыдын эртарат. Ты ушемын еҥже улмем дене кугешнем. Ме ик кугу еш семын ваш эҥертен, полшен, келшен илена, – палдара ушемын еҥже Полина Култашева. Ӱдыр Ныргындыш кыдалаш школышто 9-ше классыште шинчымашым пога.
«Ӱдыр ден рвезе-влакын республикышт» ушемлан умбакыжат вияҥаш, марий йылмым, тӱвырам жаплен илаш тыланена. Тек ушемыштышт йоча-шамыч ешаралтыт да усталык лектышышт дене куандарат.
Оля МАЙКОВА.
Снимкыште: А.А.Тимофеева ден П.Култашева.
Фотом ушемын архивше гыч налме.
