Марий Элнан рӱдолаже мотор, ойыртемалтше полат, оралте, шарныктыш-влаклан поян. Йошкар-Олам Бельги-йысе, Германийысе олала дене таҥастарат. Арам огыл тӱнян тӱрлӧ кундемже гыч турист-влак тудым ончалаш толыт. Нунылан Йошкар-Оласе Турист да увер рӱдер полша. Рӱдерым М.Иванова вуйлата.
– Мария, рӱдерын пашаж дене палдарыза.
– Ме турист-влаклан сылне верла, марий калык кочкыш, йӱла нерген каласкалена. Олаште кушто канаш, мом ончаш лийме да моло нерген увертарена. Путеводительым, картым, буклетым ямдылена. Ола мучко указатель-влакым вераҥдена. Экскурсий-влакым эртарена. Марий Элын да Йошкар-Олан моторлыкышт дене палдараш, шинчымашым налаш тӱнямбалне эртаралтше ончерлаш коштына. Ятыр проектым илышыш шыҥдарена.
– Йошкар-Ола мучко йоча-влаклан келшыше могай маршрутым темледа?
– «Йошкин пырыс дене пырля» маршрутна уло. Тудо 1-4-ше класслаште тунемше- влаклан келшен толеш. Экскур-соводын полышкалышыже йошкар пырыс курчак ик шагат жапыште ӱдыр-рвезе-влакым оланан историйже дене палымым ышта. Йоча-шамычлан оҥай лийже да ынышт нойо манын, модыш йӧным кучылтына.
– Экскурсовод могай койыш-шоктышан лийшаш?
– Экскурсовод пашажым да кундемжым йӧратыше, чулым, писе лийшаш. Калык деч ӧршаш огыл, тудын дене кутырен моштышаш. Тыгак материалым сайын палышаш да еҥ-влакым иктеш чумырен моштымо койыш дене ойыртемалтшаш.
