Кажне йоча, сценыш лектын, йӧратыме йомакше гыч геройын рольжым модын ончынеже, очыни. Йошкар-Оласе «Воштончыш» образцовый музыкально-драматический театр тидлан моткоч сай йӧным ышта. Ты театр калыклан палыме. «Тумна ден рывыж», «Мо эн шергакан?», «Кинда-Кунда» спектакльла дене ача-ава, ӱдыр-рвезе-влакын пагалымашыштым сулен. «Воштончыш» театрыш коштшо йоча-влак, икоян еш семын келшен, нелылыкым пырля сеҥен, у сеҥымашыш шуын илат. Театрыште марий шӱлыш озалана. Тушто, рольым модын, артист койышым ончыкташ веле огыл, шочмо йылмым йӧраташ, пагалаш туныктат. Изи артист-влак мастарлыкыштым Москошто, Саратовышто, Ижевскыште да шуко моло вере ончыктеныт. Одо кундемыште эртаралтше «Театр и дети» всероссийский да «Театральная юность Марий Эл» республикысе фестивальлаште сеҥышыш лектыныт. Юл кундем федерал округысо «Театральное Приволжье» йоча да самырык коллектив-влак фестивальын Марий Эл Республикысе йыжыҥыштыже сеҥыше лийыныт да окружной этапышке ушненыт. Сеҥыше-влакым 27 мартыште палемдат. Изи артист-влакым уста вуйлатыше, Марий Элын калык артистше С.И.Никитина ончыко вӱда.
1999 ийыште «Зеркало» руш музыкально-драматический йоча театр-студийым вуйлатыше О.В.Пчелина Марий самырык театрын художественный вуйлатышыже О.Г.Иркабаевлан марий икшыве-влаклан тыгаяк театр-студийым почаш темлен. Олег Геннадьевич ты пашам Марий самырык театрын артистше С.И.Никитиналан ӱшанен.
– Светлана Ивановна, тынар ий жапыште тендан шулдырда йымач ятыр артист кушкын лектын.
– Кӧ театр деке шӱман, тудо шке корныжым садак муэш. Эрвина Гордеевам, Маша Ивановам (Пчёлкина), Даниил Кораблёвым палемден коден кертам. Нуно кызыт калыклан палыме улыт. Тугеже лектыш уло. Кызытсе коллектив гычат ончыкылык артист лийыт манын ӱшанем. Изи артистем-влаклан нуным пример шотеш кондем.
– Кызыт театрыш мыняр йоча коштеш?
– Лучко наре погына. Тӱҥалтыш, кыдалаш, кугурак класслаште тунемше, студент-влакат улыт.
– Олаште илыше, утларакше рушла кутырышо икшыве-шамыч дене пашам ыштымаште нелылык лектеш мо?
– Марла сайын кутырышо йочам муаш, чынжымак, йӧсӧ. Тыгеат лиеда, йоча кутырен мошта, но театр деке шӱман огыл: кеч-кузе тырше, сценыште шкенжым ончыктен огеш керт. Тыгай икшыве-влак репетицийыш коштмым писын чарнат. Пьесын але йомакын тӱҥ шонымашыжымат сайын умылен шуктыман. Южгунам марий шомакын мом ончыктымыжым рушла умылтараш перна. Мемнан ешышке кажне ийын ушнаш кумылан-влак ешаралтме куандара, но тӱҥ эҥертыш икмыняр ий дене коштшо ӱдыр-рвезе-шамыч улыт. Нунылан кугурак рольым ӱшанем.
– Рольым пайлыме годым мом шотыш налыда?
– Артист сценыште «илышаш». Тудо муренат, куштенат, кӱлеш годым шып шогенат моштышаш. Илышыште кӧ кузерак коймым, тудын могай ойыртемже улмым шекланем. Икте янлыкын образыш писынрак пура гын, весе айдемын койыш-шоктышыжым сайынрак почын ончыкта. Ийготымат шотыш налам.
– Кажне йомаклан келшыше вургемым ыштыман. Тудым тыланда кӧ ямдыла?
– Костюмым шке вий дене ямдылена. Паша деч вара шкалан шинчын ургашат верештеш. Ача-ава-влак полшат. Сценым сӧрастарымаштат ӧрдыжеш огына код. Художникын сӱретлымыж деч вара йоча-влак дене тӱрлӧ ешартышым пуртедена. Ончаш толшо калык театрыште каныже манын тыршена.
– Пашаштыда тӱрлӧ йӧным кучылтыда. Кумдан палыме артист-влак дене пырлят ик сценыш лектыда?
– «Воштончыш» театр гыч кушкын лекше студент-влак полыш кидым шуялташ эре ямде улыт. Кугу артист-влак дене ик сценыште лияш – пайдале опыт. Лишыл жапыште «Токтар патыр» спектакльым шындаш шонена. Тышке ача-ава-влакымат ушынена. Ава, ача ден эрге мӧҥгыштӧ рольым пырля тунемыт. Сценыште вашла эҥертен модыт. Иктыже мутым монда гын, весыже полша. Тидым эскераш моткоч оҥай. Тыге йоча да ача-ава коклаште вашкыл пеҥгыдемеш, икте-весым куштылгынрак умылат.
Арина ИБРАЕВА: «Йоча-шамычлан «Воштончыш» театр улмо нерген пален налмеке, шуко шоныде, коллективыш ушненам. Тений вич ий лиеш. Рольым куштылгын тунемам. Образым чоҥымаште изиш нелылык уло. Артистлан кажне геройын койыш шоктышыжым шижын моштыман. Тидлан ме тунемына. Мый «Кинда-Кунда» спектакльыште Кинда Кундам, «Тумна ден Рывыж» йомакыште Рывыжым, «Мо эн шергакан?» спектакльыште Шемечын рольыштым модынам».
