Юзо тӱняшке корным почса

Ача-ава-влак пытартыш жапыште йочаштлан йомакым шуэн лудыт. ӧраш нимолан, кызыт телевизор дене тынар шуко мультфильмым ончыктат. Но, пагалыме кугыеҥ-влак, шарныза: икшывын мультфильмым шкет ончен шинчымыже йӧратыше ача-ава, коча-кова дене пырля йомак тӱняште лийме жапым алмаштен ок керт.

Кугыеҥ-влакын йомакым лудмышт (каласкалымышт) – тиде икте-весе кокласе вашкыл, икте-весым умылымаш. Ньога тендам тӱткын колыштеш, изинек палыме да эн лишыл йӱк кумылжым савыра. Лудмо годым сӱретым пырля ончеда, тӱрлӧ янлык, вольык семын йӱк-йӱаным луктын кертыда але йомакысе геройлан полышым пуэда. Йомак дене палдарыме годым йочан мутвундыжо пойдаралтеш, шонаш тунемеш, тӱткылыкшӧ вияҥеш.

Пагалыме ача-ава-влак, икшывыланда йомак тӱняшке корным ончыктыза. Тудо пырля эртарыме жапым нигунам огеш мондо. Йоча йомак гоч осал ден сайым ойыраш, поро лияш, еҥлан полшаш тунемеш. Йомакыште поро осалым эре сеҥа. Осал койышлан, осал пашалан мутым эре кучыман. Икшыве, йомак дене палыме лийын, тидым раш умылаш тунемеш.

Йочан ийготшым ончен, йомакым ойырыман.

Эн изи-влаклан «Теремок», «Колобок», «Репка» йомак-влак келшат. 3-5 ияш-влаклан юзо шӱлышан йомак («Про Иванушку-дурачка», «Сестрицу Аленушку и братца Иванушку») утларак лишыл. Приключений сынан йомакым («Златовласка», «Илья Муромец и Соловей-разбойник») 5-7 ияш йоча-влак пагалат.

Йомакым чын лудмо нерген ой-каҥаш:

  • Йомакым лудаш огыл, а каласкалаш тыршыман. Тыгодым йочан койышыжым шижаш лиеш.
  • Йомакым каласкалыме годым вес сомылым ыштыман огыл.
  • Коклан йоча ик йомакымак уэш-пачаш лудаш йодеш. Торешланыман огыл! Йодмыжым шуктыман.
  • Йомакым пырля модын ончыкташ лиеш.
  • Йомакым тыматлын, сылнын, герой-влакын койыш-шоктышыштым почын пуэн лудман.

Психологий да педагогике, медицине да социальный полышым пуышо «Детство» рӱдерын педагог-психологшо Л.А.ГЛАЗКОВА ден туныктышо-дефектологшо Н.А.МЕЛЬНИКОВА ямдыленыт.