20-21 октябрьыште С.Г.Чавайн лӱмеш Национальный книгагудышто «Родные языки в политкультурной среде региона: сохранение, использование, развитие» шанче-практике конференций эртаралтын. Тудо Татарстан, Чуваш, Коми, Карелий, Эстоний республикла, Моско, Сахалин, Санкт-Петербург олала гыч мер да кугыжаныш пашаеҥ, журналист, йылмызе, туныктышо, книгагудышто тыршыше-влакым иктыш ушен.
Марий Эл Республикысе Кугыжаныш погынын председательжын алмаштышыже, В.М.Васильев лўмеш МарНИИЯЛИ-н директоржо Е.П.Кузьмин, Марий Эл Республикысе тӱвыра, печать да калык-влакын пашашт шотышто министр К.А.Иванов, Марий Эл Республикысе Кугыжаныш погынын депутатше, Марий-влакын федеральный национально-культурный автономийын председательже Л.Н.Яковлева да молат саламлымаш мутым ойленыт. «Ме таче йылмым арален кодымо нерген ойлена. Тиде йодыш кызыт кажным тургыжландара. Мемнан икшывына, самырык-влак йылмым аралышт манын, республикыштына шуко паша ышталтеш. Шуко проект илышыш шыҥдаралтеш. Республикысе Марий тӱвыра рӱдер дене пырля Россий кўкшытыш ятыр проектым лукмо. Йоча-влаклан йомакым ямдылыме», – ойлен Лариса Николаевна.
Конференцийыш толшо да докладым ямдылыше кажне еҥын шке темлымашыже. Тӱняште да Российыште шагал чотан калыкын йылмышт пыта. Кажныштым йылмым вияҥдыме да арален кодымо йодыш тургыжландара. «Молодая Карелия» рӱдерын председательже А.В.Цыкарёв докладыштыже чон вургыж каласкален.
Тиде жапыштак книгагудо пашаеҥ-влакын семинарышт эртен. Кок кечаш конференций ныл регионым ушен.
Иктешлыше форум Москваште 23 ноябрьыште лиеш. Тушто паша лектышым, йылме ден кылдалтше тургыжландарыше йодыш-влакым каҥашаш тӱҥалыт.
Е.ИВАНОВА.
