«Марий Эл» ий полатыште «Мыйын еш архивем» республикысе конкурс иктешлалтын. Тудым Марий Эл Республикысе «Эр вий» йоча да подростко-влакын ушемышт Спорт да туризм министерстве полшымо дене эртарен. Ты конкурс 1994 ий гыч вийым налын да кажне гана тӱрлӧ темым авалта. Тений спортлан шӱман еш-влакым иквереш чумырен да «Сильному роду нет переводу!» ӱжмашан лийын. Конкурсышто республикысе тӱрлӧ район да олала гыч 14 еш таҥасен. Ныл еҥан еш команде «Ача, ава да мый – спорт еш!» эстафетыште, «Еш тоштер» таҥасыште писылыкыштым, чолгалыкыштым, мастарлыкыштым ончыктеныт.
Конкурсын участникше-влак, еш архивыштым кучылтын, спорт дене пеҥгыде кылым кучымышт нерген поян ончерым ямдыленыт. Йошкар-Ола гыч Зотовмыт ешын ончерже эн поян лийын. Нуным снимкыште ужыда. Чумыр конкурсым иктешлымеке, Зотовмыт икымше верыш лектыныт.
– Кеч-могай конкурс, таҥасымаш годым тугрыжланымаш уло. Тудым пырля сеҥена. Ме спорт да таза илыш-йӱла верч улына. Вашла эҥертен, икте-весылан полшен, нелылыкым сеҥен, ончыко каена. Еш эстафетыште ончыл верыш лекташ вийна изиш ыш сите гынат, писылыкнам, икоян улмынам пеҥгыдемденна. Коча-кованан, ача-аванан сеҥымашышт нерген кажне гана кугешнен каласкалена. Аралалт кодшо фотолам, медаль ден кубоклам да моло арверым икмыняр ий чумыренна. Пелашем дене икшывына-шамыч лишыл еҥна-влак гаяк лӱддымӧ, сеҥымашыш шуаш тыршыше лийышт манын шонена. Еш тоштерышкына эше ик кубок ешаралтмылан моткоч куаненна, – ойла самырык ава Анастасия Зотова.
Параньга район гыч Бирюковмыт еш эн писе, эн чулым, виян улмыжым оныктен. Нуно «Ача, ава да мый – спорт еш!» таҥасыште икымше верым сеҥен налыныт.
Таҥаслаште Петуховмыт (Шернур район), Тимофеев-Артемьевмыт (Волжск ола), Садовинмыт (Советский район), Ельмекеевмыт (Кужэҥер район) еш-влак ойыртемалтыныт.
