Кугу Ачамланде сарыште кредалше герой-влакын подвигышт самырык тукымын чоныштышт курымешлан илаш тӱҥалеш. Ӱдыр-рвезе-шамыч шымлыме пашам возат, тукымвожыштым шымлат. Морко район Купсола школын тунемшыже Надя Андреева «Самырык краевед» ушемыш икмыняр ий коштеш. Шочмо кундемым шымлаш кумылан, Кугу Ачамланде сарын ветеранже-влак нерген кумданрак пален налаш тырша. Тудлан ушемын вуйлатышыже, историйым туныктышо Л.А.Никитина полша.
– «Молодость сороковых годов…» – тыге лӱмденам шукерте огыл возымо пашамым. Школ тоштерыште Купсола ялын шочшыжо, Кугу Ачамланде сарын ветеранже, туныктышо Александр Тимофеевич Белков нерген альбомым ужмеке, тудын нерген шымлыме пашам возаш кумылаҥынам, – ойла Надя. – Александр Тимофеевич – тукым чӱчӱэм. Тудын деке ковам дене пырля икмыняр гана миенам. Йоча пагытше, сар жапше, туныктымо пашаж нерген каласкалымыжым ятыр колынам. Илыш гыч кайымекыже, пелашыже Нина Яковлевнан шарнымашыжым возенам. «Морко мланде», «Марийская правда» газетлам шергалынам. Александр Тимофеевич чыным йӧратыше айдеме лийын. 43 ий школышто туныктышылан пашам ыштен. «За отвагу», «За взятие Берлина» медаль-влак, II степенян «Отечественная война» орден дене палемдалтын.
Надя шымлыме пашаж дене «Мой род – мой народ» регионысо шанче-практике конференцийышке ушнен. Кокымшо верым сеҥен налын.
