Эр шуын. Кече кужу-кужу шокшо чапаж дене мӱкшомартам пералтыш. Кугу мӱкш-шамыч кынельыч. Нунын дене пырля – изижат.
Теҥгече мумо кугу мотор кумда олыкыш чоҥештыш. Вачий лӱманже теҥгече чыла могырымат шымлен тольо да погынымаште тыге манын:
– Эх, ну олыкат. Кумда-кумда. Мучашыжат огеш кой. Пеледышыже-пеледышыже иктыже весыж деч мотор. Мӱй тушто шуко лийшаш.
Погынымаш пунчалтеш: Вачийлан таум ышташ, эрла тушко чоҥешташ.
Тале шымлыше Вачий почеш молыжат чоҥештышт. Изи мӱкшат.
Теве олыкет. Чынак, кумда-кумда, йытыр-йытыр.
Изи мӱкш мотор гына пеледышым муо. Тушеч тамле мӱйым погыш. Омарташ чоҥештыш. Эрлашыжымат тыгак лие.
Кумшо кечын онча: тудо йытыра пеледышыштет кайык шинча. Изи мӱкш кугу кайык деч ыш лӱд, пеледышыш шинче, йодо:
– Молан мыйын пеледышыштем шинчет, пашам ышташ мешает?
– Кузе тыйын?
– Мыйын. Мый тиде пеледыш гыч мӱйым погем.
– Вара мӱйжӧ шуко?
– Уло.
– Айда тыге ыштена: мый эн ондак сылне мурым муралтем. Вара тый мӱйым погет. Тыге ыштена гын, пеледышын кумылжым савырена. Тудо тыланет шук мӱйым пуа.
Кайык мураш тӱҥалеш. Икмыняр жап гыч изи мӱкш пашажлан пижеш. Ала тыгак, ала уке, но пеледыш, чынак, мӱкшым куандарыш: мӱйым шуко пуыш.
Тылеч вара, маныт, изи мӱкш ден кайык келшаш тӱҥалыныт. Кажныже шке пашажым ыштен. Умылымаш уло гын, кеч-могай паша ушна.
Надежда РАССАНОВА.
Морко, Коркатово.
Э.Ямбаршеван фотожо.
