«Большая перемена» всероссийский конкурсын иктешлыше йыжыҥыштыже Марий Элын чапшым ныл тунемше аралыме нерген «Ямде лий» газетыште серыме ыле. Куан увер дене палдарена. Йошкар-Оласе 29-ше номеран школын тунемшыже Михаил Исмаков ден Бауман лицей гыч Илья Шавкунов сеҥышыш лектыныт. Нуным снимкылаште ужыда. Екатерина Речкина (Йошкар-Оласе 14-ше номеран гимназий) ден Агния Останина (11-ше номеран лицей) II степенян лауреат лийыныт.
Таҥасымашке Российын 68 регионжо гыч 5-7-ше класслаште тунемше 700 ӱдыр-рвезе да 30 эл гыч кугурак класслаште шинчымашым погышо 193 икшыве ушненыт. Сеҥышыш 300 йоча лектын. Нуно Москва гыч Владивосток марте поезд дене путешествийыш лишыл жапыште тарванат. II степенян лауреат-влаклан экскурсий дене каяш сертификатым кучыктеныт.
Л.ГРИГОРЬЕВА ямдылен.
Фотом Марий Эл Республикысе Образований да науко министерствын сайтше гыч налме.
