«Самырык тукым» йоча усталык республикысе конкурс 30 мартыште Республикысе курчак теат-рыште иктешлалтын. Тений конкурсышто кок таҥас лийын: «Калык модышым модын ончыктымаш» да «Шочмо эл нерген шке гыч возымо почеламут».
У Торъял район Кузнеч школысо «Мурсескем» фольклор кружокыш коштшо ӱдыр-рвезе-влак туныктышо В.И.Федорован вуйлатымыж почеш поян калык ойпогым чумыреныт да сценыште модын ончыктеныт. Тыге икымше верым сеҥен налыныт. Таҥасымашке 12 коллектив ушнен.
Арамлан огыл кугу тӱткыш калык модышлан ойыралтын. Йоча-влак модыш гоч шочмо калыкын илыш-йӱлажым, илыш ойыртемжым пален налыт. Модыш икшывын уш-акылжым, тӱткылыкшым пӱсемда, калык ой дене келшен илаш, икте-весым пагалаш туныкта.
Кужэҥер район Шӱдымарий школ гыч Даниил Горинов почеламутым шке возымо дене икымше верыш лектын. Чылаже 24 паша аклалтын.
