Еш – тиде шочмо сурт. Икте-весым йӧратымаш, пагалымаш, ойго ден куаным пайлымаш. Оршанке район Кугу Ӧрша ялыште илыше Рыбаковмыт ешыштат тыгаяк койыш-шоктыш озалана. Елена Леонидовна ден пелашыже Александр Иванович латкок икшывым ончен куштат. Тышеч нылытше шкеныштын, молышт ашнаш налме. Кок ӱдырышт ешан, шочшан улыт. Александра Юлтех университетым пытарен. Юля тиде вузын пытартыш курсыштыжо тунемеш. Молыжо школыш коштыт. Сайын тунемыт, изиракше – отличнице.
Порсын кумыл
2018 ийыште «Журавушка» реабилитационный рӱдер гыч ака-шольо куд ияш Оля ден ныл ияш Андрейым ашнаш налыныт. Ик ий гыч еш эше вич йочалан кугемын. Нуным Волжск оласе школ-интернат гыч конденыт. Икмыняр ий гыч эше индеш тылзаш ӱдырлан ача-авам алмаштеныт. Тынар икшывым ончен кушташ мыняр вий-куатым, тыршымашым пыштыман. Вет кажныже тӱрлӧ койыш-шоктышан.
– Йочам чын воспитатлыме пашалан кугу тӱткышым ойырыман да жапым чаманыман огыл. Лектышыш шуаш манын, чот тыршыман. Икшывым арулыкланат, порылыкланат, пашаланат туныктыман. Шинчымашын кӱлешлыкше нерген умылтарыман. Кажныже пиалан лийже, шонет. Юарлен куржталмыштым, весела чурийыштым ужам гын, тиде мыланем кугу куан. Воктекет толын, «Авай» манын ӧндалыт, шупшалыт, чоным луштарат. Тидыжак мом шога, – ойла Елена Леонидовна. – Ашнаш налме йоча-влак кокла гыч кугуракше – Диана. Тудым латкок ияшым конденна. Мутланаш йӧратыше ӱдыр. Школым пытарымек, Йошкар-Олаш радиомеханический техникумыш программистлан тунемаш пурен. Кажне канышлан мӧҥгӧ вашка.
Шочмо сурт
Кок пачашан пӧртышкӧ пурымаштак арулык шижалтеш. Икшыве-влаклан илаш сай условийым ыштеныт. Александр Иванович ончыч школышто физкультурым туныктен, вара каменщиклан пашам ыштен. Пакчаштышт ятыр пеледыш пеледеш. Тӱрлӧ пакчасаскам, емыжым ончен куштат. Мланде пашалан йоча-шамыч изинек кумылаҥыт. Лудым, страусым, павлиным, икмыняр урлык чывым да пий-влакым ужын, зоопаркыш логалме гай веле чучо. Тылеч посна кроликым, сӧснам да моло вольыкым ашнат. Шуко шочшан ешыште 45 ияш ава кузе чыла вере арулыкым да моторлыкым ыштен шукта, шоналтет.
– Йоча-шамыч вольыкым, кайыкым изинек йӧратен кушкыт. Яра жапышт годым пукшаш лектыт. Пашалан огыт ӧркане. Кеҥежым вӱдым тӱшкан шавена, шӱкшудым пырля кӱрына. Каҥашен, икой дене пашам ыштена. Шочшо-влаклан умылтарена: тыршымаш деч посна нимат ок шоч, – ойла ава.
Жапым пайдалын эртарат
4-ше ден 5-ше класслаште тунемше-влак Полина, Андрей, Ольга, Вова, Кристина дене школышто вашлийын мутланышна. Икшыве-шамыч спортын тӱрлӧ видше дене таҥасымашлашке ушнат да ача-авам сеҥымаш дене куандарат. 8-ше классыште тунемше Аринат сай лектыш дене ойыртемалтеш. Тудлан Марий Эл Республикысе «Роза ветров» йоча да самырык-влакын рӱдерышт «Орлёнок» всероссийский йоча рӱдерыш путёвкым тений ойырен.
Рыбаковмыт «Успешная семья Приволжья» конкурсын, «Всей семьёй» российысе проектын участникше улыт. 2023 ийыште «Мы туристическая семья!» республикысе туризм да краеведений фестивальыште диплом дене палемдалтыныт.
Кеҥежым еш дене пӱртӱсыш лектыт. Поҥгым погат, колым кучат. Йоча-влакым олалашке экскурсий дене коштыктат. Теҥызыштат лийыныт.
Школ-интернатыште илыше икшывылан кажне еҥ ача-авам алмаштен огеш керт. Елена Леонидовна ден Александр Иванович чынак кугу чытышан, йоча-влакым йӧратыше да нунын ончыклыкышт верч кӱлын тыршыше мужыр пелаш улыт. Тиде ешлан уло кумылын чыла сайым тыланена.
З.ТИМОФЕЕВА.
